కాంగ్రెస్ కి ఇప్పుడు EVM సమస్య గుర్తొచ్చింది!

 

కాంగ్రెస్ కి ఇప్పుడు EVM సమస్య గుర్తొచ్చింది!

 

దేశంలో ఎన్నికల కమిషన్ తీరుపై ఏళ్లుగా అనేక పార్టీలు ఆరోపణలు చేస్తున్నాయి. కానీ, ఏపీలో 2024 ఎన్నికల తర్వాత జగన్ మోహన్ రెడ్డి ఓటమి పాలైనప్పుడు, కాంగ్రెస్ పార్టీ దీనిపై ఒక్క మాట కూడా మాట్లాడలేదు. "అదేనా జగన్ ఓడిపోయాడు, మనకెందుకులే?" అన్నట్టుగా సైలెంట్ అయిపోయారు. కానీ ఇప్పుడు దేశవ్యాప్తంగా కాంగ్రెస్ వరుస ఓటములను చవిచూస్తున్న తరుణంలో ఒక్కసారిగా EVMలపై ఆరోపణలు మొదలయ్యాయి.

2023లో కర్ణాటక, తెలంగాణలో విజయం సాధించినప్పుడు EVMలతో ఎలాంటి సమస్యలు కనిపించలేదు. కానీ 2024లో లోక్‌సభ ఎన్నికలతో పాటు హర్యానా, మహారాష్ట్ర, జార్ఖండ్ వంటి రాష్ట్రాల్లో ఓటమి ఎదురైన తరువాత కాంగ్రెస్ పార్టీకి ఒక్కసారిగా మత్తు వదిలినట్టయింది. ఇప్పుడు "EVMలతో మోసం జరుగుతోంది, ప్రజాస్వామ్యానికి ముప్పు!" అంటూ గుండెలు బాదుకుంటున్నారు.

ఒకే వేదిక, రెండు రూల్స్?

ఎదుటి పార్టీకి ఓటమి వచ్చినప్పుడు పక్కన నిలబడి నవ్వడం, కానీ అదే దెబ్బ తమపై పడినప్పుడు గగ్గోలు పెట్టడం—ఇది కాంగ్రెస్ నేతల ధోరణి. ఎన్నికల విధానం సరిగానే ఉందని మీకు నమ్మకం ఉంటే, అన్ని రాష్ట్రాల్లో ఓటమిని గౌరవించాలి. లేదంటే, EVMలపై అనుమానం ఉన్నప్పుడే గళమెత్తాలి. ఒకప్పుడు ఇతర పార్టీలకు సరైన న్యాయం చేయకుండా మౌనం వహించి, ఇప్పుడు తమకే ఇబ్బంది వస్తే గగ్గోలు పెట్టడం పద్ధతి కాదనేది ప్రజల భావన.

ఇండియా రాజకీయం—ఇటలీ గుణపాఠం!

కాంగ్రెస్ నాయకత్వం ఇప్పటికీ భారతదేశ ప్రజాస్వామ్య పరిరక్షణను పూర్తిగా అర్థం చేసుకోలేకపోతుంది. కాంగ్రెస్ పార్టీకి ఓటమి తప్పనిసరి అయిన తర్వాతే ప్రజాస్వామ్యం గుర్తొచ్చిందా? అదే నిజం అయితే, ప్రజలు ఇక ముందు ఈ పార్టీ మాటలను ఎంతవరకు నమ్మాలి?

EVMల సమస్యపై మీరు మాట్లాడాలనుకుంటే, అది అన్ని ఎన్నికలకు వర్తించాలి. మీకు విజయం వచ్చినప్పుడు నోరుమూసి, ఓటమి వచ్చినప్పుడు మాత్రం పెద్ద గొడవ చేయడం ప్రజాస్వామ్యానికి మంచిది కాదు.

 "దెబ్బ ఎవరికైనా దెబ్బే!" – ఈ సత్యం కాంగ్రెస్ నేతలు ఎప్పటికి అర్థం చేసుకుంటారో చూడాలి!